Общество

200 ААҔААЧЧЫЛААХ ТЭЭНЭ БИБЛИОТЕКАТЫГАР ЭБЭҤКИ ТЫЛЫН, КУЛЬТУРАТЫН ҮӨРЭТЭЛЛЭР

Тээнэ дэриэбинэтигэр 503 киһи олорор, аҕыйах ахсааннаах олохтоох омуктар түөлбэлээн, бэйэбит тылбытын, культурабытын, төрүт итэҕэлбитин тутуһабыт. Манна олохтоох библиотека 1953 сыллаахха аһыллыбыта.
Маҥнайгы библиотекарынан ааҕыллар Модин Павел Михайлович, кини 1958-60 сылларга үлэлээбит. Бэйэтэ Токо (Чокурдаах) нэһилиэгиттэн ананан үлэлии кэлбит. Павел Михайлович Аҕа дойду сэриитин кыттыылааҕа. Үлэлиир бириэмэтигэр Тээнэ библиотеката республикаҕа 2-с миэстэ буолбут.
Ол кэннэ 1960-70-с сылларга Габышев Роман Константинович үлэлээбитэ. Ол үлэлии сылдьан кини культпросвет училищетыгар үөрэммитэ, худрук идэтин ылбыта уонна баянистар куурустарын бүтэрэн библиотекарынан, онтон Культура дьиэтин дириэктэринэн өр сылларга үлэлээбитэ. Эбэҥки норуотун «Чоруода» ансаамбылын тэрийбитэ. Онно үксүн эдэр ыччаты кытары үлэлээбитэ.
Библиотека аан бастаан ааҕар балаҕан быһыытынан арыллыбыт, онно араас тэрээһини ыыталлара, дьону мунньан лекция, дакылаат ааҕаллара, бэсиэдэлэр, биэчэрдэр, араас куруһуоктар, кыһыл муннуктар тэриллэллэрэ, эркин хаһыатын таһаараллара, хаһыат ааҕаллара.
Тээнэ нэһилиэгэр эбэҥки норуота олорор буолан, ол саҕаттан элбэх табаны иитэллэрэ-көрөллөрө, таба ыстаадаларыгар вертолет көтөрө. Библиотекардар табаһыттарга кинигэ, хаһыат, сурунаал илдьэллэрэ, сонуннары кэпсииллэрэ, бэсиэдэ оҥороллоро. Сайын мотуорунан, оҥочонон отчуттарга тиийэллэрэ, эмиэ сырдатыы үлэтин ыыталлара, уус-уран самодеятельность кыттыылаахтара кэнсиэр көрдөрөллөрө.
Араас сылларга элбэх киһи библиотекарынан үлэлээбитэ: Баишева Ришель Николаевна, Сивцева Вера Васильевна, Габышев Станислав Романович, Яковлева Ляна Алексеевна, Сигаева Светлана Павловна, Сигаева Наталья Спартаковна, Алексеева Лия Романовна, Нектегаева Татьяна Алексеевна, Алексеева Валентина Алексеевна, Габышева Иванна Павловна, Николаева Снежана Прокопьевна, Николаева Анастасия Климовна.
2010 сылтан библиотекарынан Габышева Алла Романовна үлэлиибин.
2012 сыллаахха бырайыак суруйан компьютернай оборудование уонна миэбэл ылбыппыт. Хомойуох иһин, 2016 сылга культура дьиэтэ, ол иһигэр библиотека уокка былдьаммыта, онно кинигэ фондата, миэбэл, компьютернай оборудование барыта умайбыта. Өссө төгүл көмө буолбут биир дойдулаахтарбар, Өлүөхүмэ улууһун олохтоохторугар, бииргэ үлэлиир кэлэктииппэр ол саҕана күүс-көмө, өйөбүл-тирэх буолбуккутугар барҕа махталбын тириэрдэбин.
Билигин кинигэм фондата туолан турар, саҥа кинигэ кэлэ турар, саҥа миэбэл, компьютер, принтер, проектор, интернет баар. Сылга 200 ааҕааччылаахпын, библиотекаҕа араас тэрээһиннэр буолаллар.
Аҕа саастаах дьоҥҥо куруһуок үлэлиир. «Эбээлэр туүмсүүлэрэ» диэн ааттаах. Пенсияҕа тахсан баран дьиэҕэ олорон хаалбатыннар диэн сыаллаах-соруктаах түмсэн үлэлиибит.
Быйыл библиотекаҕа эбэҥки тылын уонна фольклорун үөрэтии диэн саҥа куруһуок арыйдыбыт. Куруһуокпут «Дугин Буга Хутэлтын» («Орто дойду оҕолоро») диэн ааттаах. Салайааччы эбэҥки тылын үөрэтээччи, үрдүк үөрэхтээх Сивцева Любовь Владимировна. Куруһуокка оҕотуттан улахан дьоҥҥо дылы сылдьыахтара, эбэҥки тылын үөрэтии, аҕыйах ахсааннаах норуоттар суруйааччыларын айымньыларын кытары билиһиннэрии, саха, нуучча поэттарын хоһооннорун эбэҥкилии тылбаастаан ааҕыы, араас викториналар, ол иһигэр ырыа-үҥкүү куруһуога, эбэҥкилии ырыа, хоровод, үҥкүү киирэр уо.д.а.
Ааптар: А.Р. Габышева, Тээнэ библиотекара.